☺️هو إنت ما تعرفش
بقلم إبراهيم الطير
هو إنت ما تعرفش أنا مين؟
هو إنت يا حتة خدام؟
هو إنت بجد ما تعرفش المدام؟
ولا هي مين؟
ولا بنت مين؟
عيب عليك..
ده إنت شكلك ياد غلبان!
مش شايف النمرة الثمينة؟
ولا حتى حروف (ط ظ) الثقيلة؟
ولا شايف العربية الفخيمة؟
ولا شايف المدام الأصيلة؟
شكلك يا واد غلبان
أو جاي من بلاد الواق واق
ولا ساعتها كنت يا واد نعسان؟
اصحى فوق..
مش عارف مقامك!
ولا عارف مكانك!
ولا عارف إنك واقف
قدام ناس تمام؟
مش زيك يا غلبان!
نصيحة يا واد..
إوعى تفتح بوقك
وتقول أنا سعري كام!
إوعى تسأل مين ظلمك
ولا مين أهانك
ولا مين كسر خاطرك
وبإيدك تمسح دمعك
إنت في المكان.. وأي كان..
مش هتسوى حتى بصلة
في سوق البرنجان!
أخدتهم يا واد تمام؟
ومن المتنقي شتيمة.. اديتك كمان وكمان
لا حيا.. ولا أدب..
ولا خوف من رب الأكوان!
معلش يا ابني.. أصلها بقت:
إنت مين؟ وأنا مين؟
إنت واحد غلبان.. وأنا صاحب مكان
إنت واقف على الباب.. وأنا جوه المكان
إنت تسأل عن المدام!
إنت تعرف أنا مين يا ابن الحلال؟
أنا حالف ميت يمين.. أقعد ساكت
ولا ليا دعوة.. لا بالرايحين ولا بالجيّين
اسكت يا ابني وخليك مكانك
وإوعى تتكلم.. وإوعى تعلي كلامك
واعرف كويس مقامك..
إنت مجرد خدام!
إيه يا ابني.. هو إنت ما تعرفش أنا مين؟
وهنا.. سكت الكلام!
وبص الغلبان حواليه.. وقال في سره:
هو الإنسان بقى يتقاس.. بالعربية ولا بالعنوان؟
هو الإنسان بقى.. بالنمرة الثمينة وبحروف (ط ظ) الثقيلة؟
ولا بالفلوس الكتيرة.. والبدلة الجميلة؟
هو الفقير بقى مالوش كرامة؟
والغني بقى فوق كل علامة؟
هو أنا نسيت.. إننا كلنا.. إنسان؟
