م السعادي.. حين يأتي الفرح فجأة
هيا الدنيا هتضحك
لينا أصلًا تاني؟
خايفة أتعلق وألقى
نفسي بين أحزاني
أصلًا عشت حياتي
بعاني من حرماني
وفجأة عينيك ظهرتلي
خلتني أنسى كياني
بقيت بضحك وأنا
مش واخدة بالي
وأسأل نفسي كتير:
أنا إيه بس جرالي؟
وفيه حاجة بتوجعني
وأنا أصلًا مش عارفة مالي
قلبي دقته بقت قاسية
ودقات قلبي مجنّناني
حاجات جديدة بتحصلي
مش فاهمة أصلًا معناها
جوايا أحاسيس تملي
وخداني لدنيا مش عارفاها
وبقت دموعي، وبالملي
بتحكي الشوق اللي جواها
ليه ظهرت فجأة قصادي؟
اديني أهو بقيت محتارة
وبقيت فجأة «م السعادي»
بستنى منك أي إشارة
ساعتها أنفاسي بتهدى
وبحسك أجمل بشارة
لو تعرف فيَّا إيه
يا ريت تقوللي عليه
ليه أنفاسي سبقاني
وروحي تسألني عليه؟
وليه بشاركه تفاصيلي؟
وليه دايمًا بحن إليه؟
وكل ما أقول هبعد عنه
روحي تقول: ده أنا عايشة بيه!
الشاعرة
نجوى الحاروني
