نجما الكرة يفتحا النار على ناجي والفار ..ميدو : ضربة جزاء خيالية للأهلي، القباني : الفار فين ؟
ناصر العشماوي
شنّ أحمد حسام ميدو، نجم الزمالك ومنتخب مصر السابق، هجومًا حادًا على محمود ناجي الحكم الذي أدار مباراة الأهلي وإنبي، بعد احتسابه ركلة جزاء لصالح الفريق الأحمر، معتبرًا أن القرار أعاد الأهلي إلى أجواء المباراة وأثار علامات استفهام كبيرة حول صحة اللعبة.
وكتب ميدو عبر حسابه الرسمي على موقع التواصل الاجتماعي “إكس”: رجعنا للدوري المصري والقرارات المستفزة لأي متابع لكرة القدم”، قبل أن يوجه انتقاده مباشرة إلى قرار احتساب ركلة الجزاء.
وأضاف نجم الزمالك السابق: “ضربة جزاء من وحي خيال الحكم بترجع (تعيد) الأهلي تاني (مرة أخرى) للماتش”، مؤكدًا أنه أعاد مشاهدة اللعبة أكثر من مرة بحثًا عن وجود مخالفة تستحق احتساب ركلة جزاء.
وأوضح ميدو: “شوفتها أكثر من مرة، حاولت أبحث على أي دفعة من المدافع، ما لاقيتش (لم أجد)”، قبل أن يوجه انتقادًا للاعب الأهلي أشرف بن شرقي، قائلًا إنه كان يبحث عن أي لمسة للسقوط داخل منطقة الجزاء، على حد تعبيره.
فيما قال وائل القباني :
انا هنا مش هتكلم كازملكاوي انا هنا هكلمك بحياد وضمير… دلوقتي امبارح كان ف ماتشات ف الدوريات الاوروبية وماتش الاهلي… انا شوفت ماتش السيتي وماتش ليفربول وماتش طرابزون عشان صلاح وماتش برشلونه وفي الماتشات دي شوفت التحمات اقوي مليون مره من الالتحام اللي اتحسب بلنتي ف ماتش الاهلي… ورغم كده الحكم مكنش بيقوف اللعب ولا بيحسب فاول حتي وفيهم التحمات ف قلب ال18…
السؤال هنا هوا احنا ف مصر بنلعب كورة غير اللي العالم كله بيلعبها او عندنا قوانين كورة غير اللي العالم كله يعرفها… اصل انت متقنعنيش ان كورة زي دي ممكن تتحسب ضربة جزاء ولو جبتلي كورة زيها اتحسبت ضربة جزاء قبل كده وانا مش هحلل ولا هتكلم ف كورة تانية…
اصل بالعقل كده الكورة معدية الاتنين المدافع والمهاجم يعني السبب اللي ممكن المدافع يعمل بلنتي عشانه اللي هوا منع المهاجم من الوصول للكورة مش موجود..تاني حاجة قدم المدافع ثابته ع الارض والمهاجم هوا اللي جاي جري ومندفع من الخلف يعني مفيش تلامس بالقدم وايد المدافع جمبه متحركتش يعني مفيش تلامس بالايد كمان يبقي فين ضربة الجزاء يا جماعه
حتي انا كاراجل عندي حسن نيه ممكن اقولك الكورة ممكن تعدي ع حكم الملعب ممكن يكون كان سرحان او حاجه ومخدش باله غير ببن شرقي وهوا بينط ويقع… لكن حكم الفار اللي قدامه 12 كاميرا و12 شاشه بتعيد الكورة كن كل الزوايا شافها ضربة جزاء وايد قرار الحكم ده اللي مينفعش يعدي لان ده ظلم واضح لناس ف فريق الشرقية انبي اشتغلت وعملت اللي عليها عشان تطلع بنتيجة ايجابية ضد الاهلي تضيُع انت مجهودهم ف ثانية انت فاكر ان الظلم سهل… متعرفش ان ممكن واحد ﯾمُوت وممكن ينام ميصحاش من الزعل بسبب الظلم ده تخيل لو ده حصل هتقابل ربنا تقوله اية يوم القيامه لما واحد يحصلوا حاجه زي دي بسببك.
وأثارت ركلة الجزاء جدلًا واسعًا خلال مواجهة الأهلي وإنبي، بعدما كان لها تأثير مباشر على مجريات اللقاء، الذي انتهى بفوز الفريق الأحمر بنتيجة 3-2، ليحصد أول 3 نقاط له في مشواره ببطولة الدوري المصري الممتاز.
