يا بهية خبريني
بقلم إبراهيم الطير
يا بهية خبريني بلي كان
قايمة مالصبح تقطفي البرتقال
ركبتي عربية نقل
وقالوا لك ركوبة عال العال
طول النهار انحني الضهر
والشمس فوقك نار
ويا ترى غدوكي
ولا بشوجة وشوية لفت صبروكي
وآخر النهار يامه ودعوكي
حتى يمكن ما سلموش عليكي
وفي النقل ركبوكي
وعلى الطريق يا حسرتي زفوكي
الدم بقى مالي الطريق
وراح كم أخ وصديق
وبعدين صحيتوا…
بعد إيه؟
بعد ما الهم زاد
وكله بكى على فقد الولاد
معلش… أصل من زمان وكله ماشي
وعادي نموت
وأب وأم يلطموا الخدود
ما هو كله ماشي
لا يا ناس… مش عادي
طفل يخرج يدور على لقمة عيش
وام ناظرة وفي لحظة تصرخ
وتلمه أشلاء من بين الكراسي
معلش ماهو من زمان
وكله ماشي
