مفاهيم تصنع الفرق..
الحلقة الثالثة ” مش كلنا بنبدأ من نفس المكان.. بس لازم تكون الفرصة منصفة”
✍️ بقلم : إيمان الأمير
لما بنتكلم عن تكافؤ الفرص، أول سؤال ممكن ييجي في بالنا:
هل معنى إننا ندي كل الناس نفس الفرصة إننا كده حققنا الإنصاف؟
الحقيقة إن الموضوع مش بالبساطة دي.
لأن مش كل الناس بتبدأ من نفس المكان، ومش كل شخص بيواجه نفس الظروف أو نفس التحديات.
وبالتالي، الإنصاف مش معناه إننا نعامل الجميع بنفس الطريقة، لكن معناه إننا نتأكد إن كل شخص عنده فرصة حقيقية يقدر من خلالها يتعلم، ويشتغل، ويشارك، ويحقق إمكاناته.
تعالوا ناخد مثال بسيط..
لو عندنا شخصين بيتقدموا لنفس الوظيفة، واحد منهم من الأشخاص ذوي الإعاقة، وقلنا:
“إحنا فتحنا باب التقديم للجميع، يبقى كده حققنا تكافؤ الفرص.”
لكن هل فعلًا الفرصة كانت متاحة للجميع؟
لو موقع التقديم مش مهيأ، أو إجراءات الاختبار مش مناسبة، أو مكان العمل نفسه غير متاح، يبقى إحنا فتحنا الباب نظريًا، لكن عمليًا فيه شخص لسه مش قادر يوصل للفرصة.
وهنا بيظهر الفرق بين المساواة وتكافؤ الفرص.
المساواة معناها إن الحقوق متاحة للجميع، لكن تكافؤ الفرص معناه إننا كمان نشيل الحواجز اللي ممكن تمنع بعض الأشخاص من الاستفادة من الحقوق دي.
وده مهم جدًا لما نتكلم عن الأشخاص ذوي الإعاقة.
لأن توفير التعليم للجميع مش كفاية لو الطالب مش قادر يوصل للمحتوى التعليمي.
وفتح باب التوظيف للجميع مش كفاية لو إجراءات التقديم أو مكان العمل مش مهيأ.
ودعوة الجميع للمشاركة مش كفاية لو صوت بعض الأشخاص مش مسموع.
علشان كده، تكافؤ الفرص مرتبط بالإتاحة والدمج والتمكين.
الإتاحة بتشيل الحواجز، والدمج بيخلي الشخص جزء حقيقي من المجتمع، والتمكين بيديله الأدوات والقدرة، وتكافؤ الفرص بيضمن إن الطريق للنجاح مش مقفول قدامه بسبب اختلافه.
والحقيقة إن تحقيق تكافؤ الفرص مش مسؤولية جهة واحدة.
الدولة لها دور في التشريعات والسياسات، والمؤسسات لها دور في تطبيقها، والمدارس والجامعات لها دور في توفير بيئة مناسبة، وأماكن العمل عليها مسؤولية كبيرة، والإعلام كمان له دور في تغيير الصورة النمطية ونشر الوعي.
لكن كمان إحنا كمجتمع علينا مسؤولية.
لأن أحيانًا أكبر حاجز بيواجه الإنسان مش الإعاقة نفسها، وإنما نظرة المجتمع إليه.
الشخص ذو الإعاقة مش محتاج حد يختار له طريقه، ولا محتاج شفقة.
هو محتاج فرصة منصفة، وبيئة مهيأة، ومساحة يثبت فيها قدراته.
وفي النهاية
تكافؤ الفرص مش معناه إن كل الناس تبدأ من نفس النقطة…
لكن معناه إن كل إنسان ياخد الفرصة المنصفة اللي تساعده يوصل ويحقق إمكاناته.
وده هو الفرق بين إننا نتكلم عن الإنصاف وتكافؤ الفرص…
وبين إننا فعلًا نطبّقهم في حياتنا ومجتمعنا.
