إلى كل بنت ليلة زفافها
بقلم: أ.د عبد المقصود غانم
حبيبتي بنتي
ياللي جوازك هيسعدني فرحة ما تتنسيش
دا يوم زفافك .. لبيت عريسك
هيبقي يوم .. ما توصفيش
وعشان بحبك وتكوني زوجته
.. وغالية عنده ما ترخصيش
حقول نصيحة .. لو عشتي بيها
.. في ظل جوزك .. ما تتعبيش
علشان يا بنتي .. من غير متاعب
في بيت راجلنا .. عاوزين نعيش
خليكي دايما .. وياه قنوعة
وتكوني راضية .. ما تطمعيش
وشئ ما يقدر .. عليه بلاش
وأي مرهق .. ما تطلبيش
وقولي دايما .. نعم وحاضر
وفي المطالب .. ما ترفضيش
وف كل ساعة .. أوامره طاعة
والكذب خيبة .. ما تكذبيش
علشان يا بنتي .. من غير متاعب
في بيت راجلنا .. عاوزين نعيش
وتكوني دايما .. أجمل جميلة
وفي المراية .. ما تهمليش
وان شفتي شكلك .. ما يكونش رايق
قدام عيونه .. متظهريش
وتخلي ريحتك .. ريحة جناين
الريحة عندك ما تكسليش
اتزوقيله .. اتعطريله
ما دام لجوزك .. ما يهمكيش
عشان يا بنتي .. من غير متاعب
في بيت راجلنا .. عاوزين نعيش
والأكل دايما .. تِجهزهُوله
وعن ميعاده .. مَتْأَخريش
أحسن يا بنتي .. الجوع دا مؤلم
والبطن تطلب .. ما تستحيش
وإن نام شوية .. يرتاح له ساعة
في وقت نومه ما تهيسيش
مش هو يبقي .. شقيان عشانك
وفي وقت راحته .. ما تريحيش
حرام يا بنتي .. بلاش متاعب
في بيت راجلنا .. عاوزين نعيش
والبيت تحافظ عليه عنيكي
وفي كتر ماله .. ما تبعزقيش
وان جبت منه .. عيال راعيهم
وعلميهم .. ما تجهليش
وسره أوعي تقوليه لأبوكي .. عشان في عينه ما تصغريش
وبره بيته .. لأي داعي
من قبل إذنه .. ما تخرجيش
عشان يا بنتي .. من غير متاعب
في بيت راجلنا .. عاوزين نعيش
وان شفت جوزك .. زعلان شوية
في وقت همه .. ما تفرحيش
وان كان مفرفش .. وجوه رايق
في صفو جوه .. ما تعكريش
بادليه تملي .. ظروف حياته
وكوني منه .. متفرقيش
وبين حماتك .. وأخت جوزك
تكون محبة .. ما تكرهيش .
عشان يا بنتي .. من غير متاعب
في بيت راجلنا .. عاوزين نعيش
وان حد قال لك . كلام في حقه
من غير عنيكي .. ما تصدقيش
وان غيرتي غيري .. عليه براحة
مش غيره نارها .. ما تنطفيش
ولو مشيتي .. في نور كلامي
حانعيش وطبعا .. فراق ما فيش
الله يبارك .. لكي في جوزك
وتجينا زايره .. ما تغضبيش
وانا تحت أمرك .. وأقول معاكي .
في بيت راجلنا .. عاوزين نعيش
