الحريه مسؤوليه،،،،،بقلم فاروق العوامري
مش كل واحد مسك قلم يبقى صاحب رأي يُحترم، ولا كل زيارة سريعة لبلد تعطيك حق تصدر أحكام على شعب كامل. اللي كتبته مش نقد ولا حتى سخرية ذكية… دا نموذج صريح للتعالي الرخيص ومحاولة لافتعال جدل على حساب الحقيقة.
حضرتك ما لم تقدم معلومة واحدة موثوقة، كل اللي قدمته أرقام مضروبة وحكايات مفبركة، وخلطت بينهم عشان تطلع بصورة مشوهة لمدينة بحجم القاهرة وشعب بحجم المصريين. ولما تختزل بلد كاملة بتاريخها وناسها وثقافتها في “نكتة” عن كلاب وأكل وشوارع، يبقى أنت كده مش بتنتقد… أنت بتكشف محدودية رؤيتك وسطحية طرحك.
اللي يحزن فعلًا إن في ناس لسه فاكرة إن قلة الذوق اسمها جرأة، وإن إهانة الشعوب اسمها حرية رأي. لا يا سيدي… الحرية مسؤولية، والنقد له قواعد، وأبسطها إنك تكون أمين في عرضك، مش تزوّر الواقع عشان تصنع لنفسك ضحكة رخيصة أو تفاعل مؤقت.
مصر اللي بتتكلم عنها دي بلد عدّت بحروب وأزمات وتحديات، ولسه واقفة بناسها اللي بتشتغل وتبني وتتحمل. الناس اللي حضرتك شايفهم من بعيد دول، هم اللي شايلين البلد كل يوم، مش محتاجين شهادة من حد، ولا تقييم من مقال متسرع.
واللي واضح إنك اخترت تنظر بنصف عين… عين شايفة العيوب وبتكبرها، ومغمضة عن أي حاجة تانية. ودا مش عيب في البلد، ده عيب في طريقة التفكير نفسها. لأن اللي بيدوّر على التشويه بس، عمره ما هيشوف الحقيقة حتى لو كانت قدامه.
لو فعلاً عندك نقد، قدمه باحترام وبمعلومات حقيقية. إنما اللي اتكتب ده مجرد استعراض ضعيف، ومحاولة يائسة للظهور على حساب كرامة ناس كاملة.
وفي النهاية، خلّيها واضحة: مصر أكبر من أي قلم يحاول يصغرها، وأقوى من أي سطر مكتوب بغرض الإثارة. واللي يفتكر إن التقليل من بلد زي مصر هيزوده قيمة، بيكتشف في الآخر إنه هو اللي قلّ قدام الناس كلها.
