الجار يكشف أسرار وخبايا في حياة القاضي المزيف !
ناصر العشماوي
كشف محامي أحد ضحايا القاضي المزيف، وجاره في ذات الوقت، خلال مداخلة هاتفية مع الإعلامية علا شوشة ببرنامج “الشفرة” ،
بعض أسرار حياة القاضي المزيف ،والذي كان يشتهر في بلدته بلقب المستشار مصطفى بك !
وإلى نص الحوار التلفزيوني :
– حضرتك بتقول إنه جاركم في البلد وعارفين بعض، ما طالما عارفين بعض إزاي صدقتوا إنه قاضي؟
= يا فندم هو مفهم أهل بيته أساسًا إنه حاصل على ليسانس حقوق
– يعني خدع والده ووالدته كمان؟
= اه قالهم إنه معاه ليسانس حقوق واتضح انه معاه دبلوم صنايع، وكان مفهم والده ووالدته إنه في ثانوية عامة وهو في ثانوي صنايع
– عنده اخوات؟
= اه
– متخرجين من جامعات؟
= لا
– ووالده ووالدته مش متعلمين اكيد صح
= بالظبط كدة، وبمجرد ما نشر خبر تعيينه في مجلس الدولة عملوله هناك حفلة واحتفلوا بيه
– هو الخبر اللي عندنا إن هو اللي عمل الحفلة وعمل د**بايح وعمل حفلة كبيرة جدًا وعزم أهل البلد كلهم
= اه حصل
– طيب جاب الفلوس دي كلها منين؟
= أهله يا فندم هو مستواهم معقول
– طيب هو كان بيأجر قاعة المحكمة دي ازاي؟
= هي مش بتتأجر هو كان بيدفع ١٠٠٠ ولا ٢٠٠٠ ج رشوة ويفتحوله القاعة ويقعد ع المنصة ويطلعوا له الملفات ويتقمص شخصية القاضي ويتصور صور وفيديوهات وينشرهم لتحقيق أهدافه في أعمال النصب، والنيابة قعدت تحقق معاه أكتر من ٢٤ ساعة متواصلة .
