بقلم: إبراهيم الطير
عاوزة ميراثي
ليه يا با تبقى قاسي
أنا بنتك من لحمك ودمك
ليه تحرمني من ميراثي
كبرت في حضنك سنين
وكان حضنك أجمل مراسي
ولما جه يوم الميراث
بقيت عليا قاسي
الأرض دي شربت خطاوي
وشافت ضحكتي وياما سمعت مني غناوي
إزاي أخويا يبقى صاحبها
وأنا غريبة وسط ناسي
قالولي خدي كام جنيه
وسيبي الأرض لأخوكي
طب والذكريات اللي فيها
مين يقدر يوم يشتريها
ما تكسروش قلب البنات
بالظلم وقطع الصلات
المال يفنى مع السنين
والذنب يبقى بعد الممات
بكرة يكون ليكم حفيدة
تشرب من نفس كاسي
ليه نخالف شرع ربنا
وما نعدل بين الأخوات
وصى الرسول بينا جميعا
وقال العدل خير الصفات
عاوزة ميراثي
ليه يا با تبقى قاسي
أنا مش عاوزة غير حقي
اللي ربنا سماه ميراثي
