مسروق نهارها
بقلم: الشاعرة نجوى الحاروني
اشمعنى أنا… اللي اتعلقت بيها؟
ياما قلت بلاش… ده أنا أسوأ حاجة تلاقيها.
أنا اللي الدنيا دمرتها… واللي جت عليها،
روحي جوايا ماتت… مبقاش في شيء يحييها.
شايف فيا إيه تاني… عكس الحقايق؟
روحي ولا عيني… قلبي ياما عاش متضايق.
عاش وحيد يقاسي… حزين ومش رايق،
فقد الثقة والأمان… قلبي مبقاش فايق.
حبيت فيها إيه… وليه روحك تختارها؟
وإيه الحب وليه… مدوقش في الدنيا غير مرارها؟
قلبي مش شايف غير… تربة ولنفسه بيحفرها.
استغلوا براءة قلبي… بقيت صورة محبش تعرفها.
انكتب عليا الخوف والأحزان… دي روحي وده قدرها.
ابعد… واختار لك قلب تاني،
واختار روح لسه معاها نهارها.
