*ورقة وقلم وفنجان شاي*
*بقلم: د. محمد عوض سالم*
20 ألف و20 سنة: روشتة إنقاذ الصحة في مصر
*20 ألف و20 سنة: روشتة إنقاذ الصحة في مصر*
الطبيب مش موظف، والتمريض مش “مساعد”، وعامل النظافة مش “زيادة”. دول خط الدفاع الأول عن وطن كامل.
لما ندخل مستشفى حكومي نلاقي زحمة وطابور ووش تعبانة، المشكلة مش في “الناس الكتير”. المشكلة إننا خلينا المنظومة كلها تختار كل يوم بين لقمة عيشها وبين ضميرها. فكانت النتيجة: هجرة عقول، عجز في الأطقم، ومريض بسيط تايه في النص.
*النقطة الأولى: أجر يليق بالمسؤولية*
لو عايزين طبيب يبات في الاستقبال وعينه على المريض مش على الفاتورة، لازم نأمنه مادياً. *المقترح: 20 ألف جنيه شهرياً حد أدنى لطبيب المستشفى الحكومي.*
والكلام هنا مش للطبيب بس. التمريض، فني الأشعة، فني المعمل، الإداري، عامل النظافة… كل واحد فيهم ترس أساسي. *لما نأمن المنظومة كلها مادياً، هنقفل باب هجرة الأطباء للخارج، ومش هنعاني من عجز في الأطباء تاني.* الشبعان مادياً هو اللي بيعرف يدي بضمير.
*النقطة التانية: الخبرة قبل الربح*
العيادة الخاصة حق، بس مش من أول سنة. *المقترح: منع فتح عيادة خاصة إلا بعد 20 سنة خدمة فعلية في المستشفيات الحكومية والجامعية.*
الـ20 سنة دول هيرجعوا هيبة المستشفى الحكومي. هتتحول لمدرسة طب حقيقية، والمريض الغلبان هيتعالج على إيد استشاري عدّى على 3 أجيال مرضى، مش طبيب امتياز تايه.
*أمثلة دول سبقتنا ونجحت:*
السر مش اختراع. هناك 4 دول عملتها ونجحت الأولي هي *بريطانيا – NHS*: المستشفى الحكومي هو الأساس. 90% من البريطانيين بيتعالجوا ببلاش. الطبيب الاستشاري بيشتغل للوزارة الصبح، والخاص بعد الضهر وبعدد ساعات محدود. فـ الكفاءات كلها في خدمة الدولة الأول.
والثانية هي *كوبا*: رغم الحصار، عندهم أقوى رعاية أولية في العالم. الطبيب والممرض موظف دولة بمرتب يكفيه. ممنوع العيادات الخاصة أصلاً. فـ كل الدكاترة الشاطرة في الوحدة الصحية اللي في شارعك. النتيجة: متوسط عمر أعلى من أمريكا. والثالثة هي *تركيا – من 2003*: عملوا “برنامج تحول صحي”. رفعوا رواتب كل الطاقم الطبي + منعوا ازدواج الشغل. فجأة المستشفى الحكومي بقى أنضف من الخاص، والدكاترة بطلوا هجرة، والسياحة العلاجية دخلت لهم مليارات.
والرابعة هي *السعودية*: بيدوا بدلات تفرغ ورواتب عالية للأطباء والتمريض والفنيين مقابل الالتزام الكامل بالمستشفى الحكومي. ممنوع تفتح عيادة خاصة إلا بإذن وبعد سنين خبرة. فـ بقى عندهم وفرة في الكوادر.
*الملف المنسي: مستشفيات التكامل المغلقة*
قبل ما نبني جديد، نحاسب على القديم. عندنا عشرات *مستشفيات التكامل* اتبنت بمليارات في القرى والمراكز، وبعد الافتتاح بشهرين اتقفلت “لعدم وجود كوادر طبية”.
بنينا الحيطة والسقف، ونسينا نبني الطبيب والتمريض. حرام نبني مستشفى ونقفلها، وفي نفس الوقت نشتكي من عجز الأطباء. الحل مش في الطوب، الحل في اللي جوه الطوب.
*الخلاصة:*
الطب مش تجارة. الطب وطن. والوطن مش حيطة وسقف… الوطن روح تطمن جنبها.
لو أمنّا المنظومة كلها مادياً وكرامة، وربطناها بالمستشفى الحكومي 20 سنة، هنفتح مستشفيات التكامل المقفولة، ونبني صحة بجد.
