ذوي الإعاقة في مواجهة التغير المناخي.. تحديات أكبر ودور مهم في الحل

كتبت :  ايمان الامير 

في وقت بقت فيه التغيرات المناخية بتأثر على كل تفاصيل حياتنا، في فئات بتتحمل العبء الأكبر من غيرها، وعلى رأسهم ذوي الإعاقة.

لكن رغم التحديات، بيظهر دورهم كجزء مهم من الحل مش مجرد متأثرين بالأزمة.

التغير المناخي بقى واقع بنعيشه كل يوم، من موجات حر شديدة لسيول وأمطار غير متوقعة.

وفي وسط كل ده، ذوي الإعاقة بيواجهوا صعوبات أكبر، سواء في الحركة أو الوصول للخدمات،

وده بيخلي تأثير الأزمات عليهم مضاعف مقارنة بغيرهم.

لكن الحقيقة اللي ناس كتير مش واخدة بالها منها، إن ذوي الإعاقة مش بس محتاجين دعم، لكن كمان عندهم دور مهم جدًا في التوعية بقضايا البيئة.

بقينا نشوف أمثلة لشباب بيقدموا محتوى توعوي عن إعادة التدوير أو ترشيد استهلاك المياه،

وبعضهم بيستخدم لغة الإشارة عشان يوصل الرسالة لفئات أكتر في المجتمع.

مبادرات لزراعة الأسطح خلال السنين اللي فاتت

ومش بس كده، دورهم كمان بيمتد للابتكار والحلول العملية. في مصر، خاصة في القاهرة والجيزة، ظهرت مبادرات لزراعة الأسطح خلال السنين اللي فاتت،

وشارك فيها بعض ذوي الإعاقة من خلال مشروعات بسيطة في بيوتهم، ساعدت في تقليل الحرارة وتحسين جودة الهواء.

كمان في جمعيات أهلية بتقدم ورش لإعادة التدوير، وبيشارك فيها ذوي الإعاقة في تحويل المخلفات لمنتجات مفيدة، وده بيساعد في حماية البيئة ويوفر فرص شغل ليهم.

وعلى مستوى العالم، في دول زي المملكة المتحدة والهند، تم إشراك ذوي الإعاقة في مبادرات بيئية، سواء في التوعية أو إعادة التدوير

أو حتى المشاركة في التعامل مع آثار الكوارث الطبيعية، وده بيأكد إنهم يقدروا يكونوا جزء حقيقي من تحقيق الاستدامة.

ورغم كل الجهود دي، لسه في تحديات كبيرة. وقت الكوارث زي الفيضانات أو العواصف، بيكون من الصعب عليهم التنقل أو الوصول لأماكن آمنة.

كم ان التلوث وموجات الحر ممكن يأثروا على صحتهم بشكل أسرع، خاصة لو الخدمات مش متوفرة بشكل مناسب.

عشان كده، لازم يكون في اهتمام أكبر بيهم من خلال توفير أماكن آمنة مجهزة،

وخدمات طوارئ مدربة، وكمان برامج تدريب تساعدهم يعرفوا يتصرفوا وقت الأزمات.

والأهم إنهم يكونوا جزء من اتخاذ القرار، لأنهم الأقدر على شرح احتياجاتهم.

وفي النهاية، ذوي الإعاقة مش بس محتاجين حد يحميهم من التغيرات المناخية، لكن كمان عندهم قدرة حقيقية إنهم يكونوا جزء من الحل.

لما نديهم فرصة ونسمع صوتهم، هنلاقي إنهم بيضيفوا للمجتمع قوة مش عبء، وبيساعدونا نواجه المستقبل بشكل أقوى وأوعى