عيد الأم من غيرك
بقلم / هويدا الطحان
عيد الأم جه… والفرحة ناقصة
والضحكة تايهة… والروح حابسة
كل الناس بتجري بهداياها
وأنا بهديك دموعي القاسية
فين إيدك اللي كانت تطبطب؟
فين حضنك… لما الدنيا تغلب؟
فين صوتك لما أنادي “يا أمي”؟
يرد عليّا ويقول “قلبك”؟
البيت بعدك بقى سكون
والضحك مات… وبقى حزين
كل ركن فيه بيقول اسمك
وكل حاجة بتوجع سنين
كنتِ الأمان… كنتِ الحياة
كنتِ الدعاء وقت الشدّة
دلوقتي واقفة لوحدي تايهة
والقلب شايل ألف حِدّة
ياريت في عيدك ترجعي لحظة
أحضنك… وأبكي من غير صوت
أقولك وحشتيني أوي
وأخبي وجعي جوا حضنك شوية
بس القدر كان أقوى مني
وخدك في سكون وسلام
وسابني أعد الأيام بعدك
وأعيّد عليك بالآه والآلام
يا أمي… لو بيوصل لك صوتي
كل سنة وأنتِ في الجنة أحلى
وإن كان عيدك بعيد عني
فأنتِ في قلبي… عمري ما تغيبِ أبدًا
