الجرس رن و ابتدت الحكاية ده جرس مدرسة و له جرس انذار انها بداية حرب
الجرس رن و ابتدت الحكاية
ده جرس مدرسة و له جرس انذار انها بداية حرب
كتبت / سمر جرجس مرقص
اخصائية ارشاد نفسى و اسري و زواجى و تعديل سلوك
المدرسة مش مجرد شنطة فيها كراسات وأقلام و لا باص و منبة و لانش بوكس
المدرسة هى بداية موسم جديد مليان قصص و تحديات و دموع وضحك و احلام جديدة
موسم العودة للمدارس مش مجرد تغيير فى مواعيد النوم و الاكل بس ده بيغير نظام البيت كله خصوصاً الامهات اللى من أول سبتمبر بتحس إنها داخلة سباق ماراثون
– تصحي العيال بدرى
– تحضري سندوتشات
– تراجعي واجبات
وتفضلي طول اليوم في دوامة اسمها Back To School
السؤال بقا ليه Back to School حدث مش عادي؟
– لأنه فرصة لبداية جديدة
بتحس إن عندك فرصة تبدأ من الأول تنظم وقتك وتحقق اللي ما أنجزتوش السنة اللي فاتت.
– لأنه اختبار أعصاب للأهالي مصاريف ، تحضيرات ، دوشة، صحيان بدري ، ومذاكرة مستنياكى على الباب
– ولأنه كمان محطة مهمة للأولاد صحاب جداد ، مدرسين جداد ، وأهداف لازم يتعلموا يحققوها خطوة بخطوة.
و كمان مشاعر متناقضة
الغريب إن نفس اللحظة ممكن تجمع حاجتين متناقضين
– الطفل متحمس يشوف أصحابه وفي نفس الوقت قلبه مقبوض من فكرة الامتحانات.
– الأم فرحانة بالروتين المنتظم بس برضه مش قادرة تستوعب كمية المذاكرة و المراجعة و الدروس
– الأب بيحاول يظهر قدام البيت إنه قوي ومسيطر لكن جواه بيشيل هم المصاريف و الالتزامات الكتير
المشاعر المتناقضة دى بتعمل ضغط زيادة علينا خصوصاً فى بدايه الموسم الدراسى و علشان كده محتاجين نتعامل مع الضغوط دى بذكاء .. طب ازاى ؟
تعالى اقولك إزاي نتعامل مع الموسم ده بذكاء ؟
١- خططى من بدري
ما تستنيش آخر يوم علشان تشتري الأدوات التوتر و الزحمة بيخلّي أي قرار غلط .. خليكى جاهزة من بدرى
٢- اعملى روتين نوم ثابت
ولادنا محتاجين يناموا بدرى علشان يصحوا فايقين .. خلى الموبايل بعيد عنهم قبل النوم بيومين على الاقل من بداية الدراسة
٣ -اعملى لاولادك لانش بوكس ذكي
مش لازم يكون فخم أو غالي الأهم يكون صحي ومليان طاقة.
٤ – شاركوا أولادكم
خليهه يختاروا شنطتهم و ادواتهم المدرسية المشاركة ده بيخليهم متحمسين.
٥ – اتكلمى معاهم
اسمعى مخاوفهم الطفل اللي قلقان من مدرس جديد أو أصحاب جدد محتاج ماما تسمعه و بابا يطمنه
طيب إزاي نخلي المذاكرة سهلة من غير صراع؟
المذاكرة ساعات بتتحول لمعركة يومية في البيت
الأم بتزعق والطفل بيتحايل أو يزوغ والجو كله يتوتر علشان نحول المذاكرة لتجربة أهدى وأسهل ممكن نمشي على شوية خطوات:
١. حددى وقت ثابت
الطفل لما يتعود إن فيه ساعة محددة للمذاكرة يوميا بيبطل يماطل أو يزوغ.
٢. قسمى المذاكرة لاجزاء صغيرة مفيش حد بيستحمل يذاكر ٣ ساعات على بعض
٢٠ دقيقة تركيز + ٥ دقايق راحة بتدي نتيجة أحسن
٣ . اختارى مكان مناسب للمذاكرة
بعيد عن التلفزيون والموبايل بس مش منعزل زيادة يخليه يحس بالعقاب مكان مريح ومنظم يفرق جدًا.
٤ . استخدمى التعزيز الإيجابي
يعنى كلمة تشجيع أو مكافأة بسيطة بعد ما يخلص جزء من المذاكرة بتشحنه بطاقة إيجابية.
٥. شاركى الطفل معاكى
اسأليه تبدأ بأي مادة أو إيه الطريقة اللي بيحبها فى المذاكرة (مراجعة ، كتابة، أو شرح)
المشاركة بتقلل المقاومة
٦. حولى المذاكرة للعبة
مسابقات صغيرة ، أسئلة سريعة ، أو حتى استخدام ألوان ورسومات بتحول الجو من توتر لمرح
٧ . افصلى مشاعرك عن المذاكرة المذاكرة مش دليل على حبك أو كرهك لابنك خلي النقاش عن الواجب نفسه مش عن شخصيته
٨. ركزى على المجهود مش النتيجة
لما تمدحى محاولته بدل ما تركزى بس على الدرجة اللى هيجبها الطفل بيبطل يخاف من الفشل.
ماما و بابا .. الأبطال الخفيين 💪
وراء كل طالب ناجح فيه أم وأب بيصحوا بدري بيذاكروا معاه وبيتحمّلوا العصبية والمصاريف.
Back to School
اختبار للأسرة كلها مش للطفل بس
الأم بتتعامل مع المذاكرة و جروب الماميز و الشيتات اللى بتخنق موبايلها واللانش بوكس الفاضي و الصحيان من الفجر
والأب بيتعامل مع الضغوط المالية و المصروف ، الدروس ، و الطلبات و الالتزامات
لكن فى النهاية هما الابطال الحقيقيين اللى بيبنوا للأولاد بيئة يقدروا يكبروا ويتعلموا فيها ويحققوا احلامهم 🌏
لحظة الحقيقة
المدرسة مش بس مناهج وامتحانات المدرسة هي المكان اللي الطفل بيتعلم فيه إزاي يفكر إزاي يتعامل مع الناس وإزاي يواجه تحديات الحياة.
كل ورقة بيكتبها كل سؤال بيسأله كل موقف بيتعرض له ده جزء من شخصيته اللي بتتبني
أخيراً
Back to School
مش موسم شنط وكتب و لانش بوكس و بس ده موسم أمل و احلام
هو يمكن يكون مرهق ومكلف بس
المدرسة مش ورق وكراسات وبس المدرسة بتصنع ذكريات وأحلام وبتبني جيل هيكمل الطريق بعدنا.
لو عرفنا نحتوي ولادنا ونشجعهم ونعلمهم إزاي يتعلموا من غير خوف وقتها الموسم ده مش هيكون مجرد بداية سنة دراسية لكنه هيبقى مو
اخصائية ارشاد نفسى و اسري و زواجى و تعديل سلوك
