(قلبي فاضحني)
بحاول ابعد ومقربش….خايفه منه ليه معرفش
وفي عز ما انا ببعد عنه…القى روحي تقول مقدرش
بوجوده يطمن قلبي…….وانا من حنانه مبشبعش
ولما يبعد يوم عن عيني….في قلبي غيره ميسكنش
ببعتله واستنى سلامه …
يوحشني صوته وكلامه…
واتمنى اسكن احلامه…
واعيش عشانه ايامه….
نسى لقلبي أوهامه……
حاولت وبستغرب مني…. ليه قلبي بطل يتالم
نسيت في قربه اني بعاني… حابه اني منه بتعلم
بغرامه قادر يملكني….. آسرني من غير مايسلم
قابل بجناني وبعيوبي ….وفاهمني من غير ماتكلم
بحبه وبكدب نفسي…
ونفسي اقوله اللي في نفسي…
لو غاب للحظه بيوحشني…
ببساطه كده مالك همسي….
من صوتي بس بيفهمني…..وف ضعفي هو يطمني
يسهر ليلاتي ويحكيلي….يسمع غنايا ومواويلي
فاهم كلامي وافعالي …..ومن نظره بس بيعرفني
بقول وبرجع في كلامي..
وبقول له لازم تنساني…
وانا نفسي يملك ايامي…
ما هو اصلا مالك احلامي….
لو حاول يتقل ويعاند…. روحي ف بعاده تعذبني
عقلي يفضل كده شارد….لحد اما يجي يطمني
وتقوله غيابك ليه عني…ومن غير ما اكمل يفهمني
حبيته ليه انا وازاي …وده قلبي رافض يسمعني
الشاعرة نجوى الحاروني
