(الكدابين)
✍️ الشاعرة نجوى الحاروني
لما انت ناوي توجعني …قربت ليه اصلا مني
كنت سيب قلبي كده …وحيد بس متهني
سكنت روحي بكلامك…وسرقتني مني
واول منا حبيتك….وجعك هو اللي كسرني
حياتي كانت كده كده بايظه
بكمل فيها يومي
ومن الدنيا مش عايزه
كنت سيبني في حالي
مكنتش عايزه جايزة
وآدي بعدك بقى حالي
لا انا خسرانه ولا فايزه
يشهد على قلبي…كلامنا لحد الفجريه
وتقوللي سكنتي روحي…انتي اللي فعنيا
لو انسى كل الناس…ليكي بس الحنيه
والقسوه مجتش غير…م اللي صدقته عنيا
وليه سؤال وسألته ليك
قبل ما أسأله لنفسي
ذنبي اني صدقت عنيك
ولا إني كدبت حسي
مش عارفه ادعي ليك ولا عليك
هعيش بكسرة نفسي ويأسي
انا مبقتش هيا…البنت اللي ف العشرين
جرحك علم فيا…هعيش بوجعه سنين
انت اخترت تبعني…وخلتني اقول آمين
ولو حن ليك قلبي…هفكره بالناس الكدابين
