الحقوني… بنتي هتجوز
✍️ بقلم / إبراهيم الطير
قالوا لي بنتك جالها عريس
قلت الحمد لله الكريم
بس قلبي ما عرفش يفرح
والفرحة بقت حمل أليم
بقيت أحسبها ألف مرة
وأعد ديوني كم جنيه
وأقول يا رب استرها معايا
أنا راجل على بابك… أعمل إيه
كل ما أقول ده آخر طلب
يتفتح ألف باب جديد
وكأن الفقير يا ناس
مكتوب عليه همه يزيد
بقيت أخاف من كلمة عريس
قالوا دي فرحة بنتك
ما ينفعش فيها تقول لا
وأنا نفسي أفرح والله
بس أجيب منين… وأنا على الله
طب واللي جيبه فاضي يجيب منين يا ولادي
منين يجيب حلم العمر
ولا يسرق ولا يبيع ضميره
ولا يرمي نفسه في بحر الديون
ويعيش باقي عمره أسيره
مضيت شيكات وأنا مكسور
وقلت بكرة ربك كريم
ويجي بكرة معاه مأمور
يقولي يلا على السجن يا غريم
دخلت أنا وسيبت بيتي
والدمعة ساكنة جوه العين
صغير بيسأل في براءة
هو بابا راح فين
البيت كله همس وأنين
وكل ركن فيه حزين
بقيت أخاف من كلمة عريس
يا ناس… الجواز ستر ورحمة
مش معرض وعفش ولا مزاد
ارحموا قلب كل أب غلبان
نفسه يفرح بالولاد
سيبوا البيوت تتبني بالمودة
والحب يغلب كل العناد
ما تحملوش أب فوق طاقته
ولا تبيعوا فرحة الأولاد
بقيت أخاف من كلمة عريس
