ياريتنا.
بقلم الكاتبة/ إيمي جبر
ياريتنا ما كبرنا على الوجع بدري
ولا عرفنا خيانة الأيام
ياريتنا فضلنا نصدق
إن القلوب مرايات
وإن الضحكة ما وراهاش ألم
ياريتنا ما حسبنا الحب حساب
ولا وزّنا الشوق بالعقل
كان نفسنا نحب وبس
من غير ما نخاف
من كلمة،
ولا من بكرة،
ولا من آخر الطريق
ياريتنا لما اتكسرنا
لقينا إيد تضمنا
مش درس يوجعنا
ولا ذكرى
تطاردنا في نص الليل
ياريتنا ما تعلمنا القسوة
ولا لبسنا وشوش غير وشوشنا
ولا خبّينا ضعفنا
عشان ما حدش
يستقوى علينا
ياريتنا فضلنا بسيطين
نفرح من أقل حاجة
نحزن ونعدّي
من غير ما القلب
يتوسّع للأوجاع
ياريتنا…
بس الحقيقة إننا كبرنا
والدنيا علمتنا غصب
إن مش كل اللي بنحبه بيفضل
وإن بعض الفراق
رحمة
مش خسارة
لكن رغم كل ده
لسه جوانا طفل
بيقول:
ياريتنا…
ولو مرة
نرجع أنقياء
زي الأول.
