لسة قادرة
بقلم الشاعرة / سماح محمود
لسة فيكي حيل تشيلي
من هموم ف ماضي فات
لسة حاضنة جوة قلبك
كوم تعب وذكريات
لسة قادرة تشدي حيلك
لسة قادرة تقولي باقية
لسة فيكي روح تعافري
وانتي م المرارة شاربة
لسة قادرة تحبسي فيكي السكات
لسة حابة ناس بتعشق
كل يوم ليكي العناد
لسة بتصوني المشاعر
لسة قلبك فيكي شاعر
لسة ألمك فيكي عايش
بس بتداري الأهات
لسة صالبة بردو حيلك
قولي مين قادر يشيلك
وانتي شايلة الكل دايما
لسة رافضة للبعاد
لسة فرحك فيكي قادر
ينسي خوف عليكي قادر
يكسر الضعف اللي جابك
عند ناس جواهم مات
لسة عايشة بقلب طفلة
لسة فيكي شوق ولهفة
أن العمر الجاي ليكي
يخطفك من عمر فات
لسة شوقك فيكي حاضر
لسة بتعدي المخاطر
بس مين عملك خاطر
ولا مين ف قلبك بات
لسة شاربة حب ضايع
لسة سكناكي المصارع
مين قدر ليكي يسارع
يسعدك حتي بفتتات
يا اللي عمرك فاض محبة
ترتوي حبة بحبة
من سنين فاتت عليكي
تسقيكي مر الشتات
