كلمات من وحي شهداء القرية !
*
ناصر العشماوي
**************
نور الفجر طل
ف وشوش الصبايا
والنهار يدوبك هل
وابتدت الحكاية !
……………………
الحلم ماشي بعكازين
الأمل
ودمع العين !
ويامين
للصبايا الشقيانين ؟!
……………………..
وسمعت صرخة صوت
بترج في الملكوت
لحظة ماكان النزيف
بيعمر ..
رصاصة
لانطلاق الموت !
………………….
أسفلت الشوارع
نار
والفقر دايس ع الطريق
بالدم
وبياخد التار !
………………… . …
سامحونا موش قادرين
ع الزمن
وليلو الطويل
لسة يدوب
بتشتهجوا الأمل
لقيتوا الضمير
بيبلع النهار ف جوفه
زي وحش كبير !
……………………..
وراح اللي راح
وضاق
ضاق قوي البراح
لما البراءة راحت
دنيتنا كانت
شمعة
ودابت !
………………….
ياست يا ام العيال
خلي حزنك آية
تقريها تسمعها الجبال
تخشع
وتنولي الهداية
…………………… . .
اللي مصبرنا نولتوا
الشهادة ..
رغم الجراح
والفراق
ولا ألف عام عبادة
تبقوا عند الرب
أحياء !
