فانتازيا من واقع الخيال ..شاهد تصريحات حسام والبرامج ونجوم الكرة والإعلام بعد فوز مصر على أنجولا بهدف واحد !
بقلم : نصر العشماوي
انتهت مباراة مصر وأنجولا، في التصفيات المؤهلة لأمم إفريقيا 2026 ،بهدف واحد دون رد ،أحرز زيزو هدف المباراة الوحيد من تسديدة قوية سكنت الشباك على يسار حارس أنجولا .
وتوالت بعدها التصريحات بعد المباراة :
حسام حسن في المؤتمر الصحفي بعد المباراة :
خروج صلاح كان امرا فنيا بحتا وقد أحرز البديل زيزو هدف المباراة وده يدل ان مش شرط لكونك لاعب كبير إنك تستطيع التسجيل على الدوام ، فيه رؤية فنية بتحكم الجهاز .. وبنعرف امتى نغير وامتى ندفع بلاعب ونخرج لاعب ،
وياريت ماحدش يقولي ليه بتخرج فلان أو بتخرج علان او تنزل ترتان ، ياريت نبطل هر هر هرتلة يعني، لأن دي رؤية فنية لا يملكها إلا المدير الفني ، حصلنا على الثلاث نقاط واصبحنا في القمة مع مالاوي وانتظروا المزيد والمزيد واحنا فرحنا الشعب بتاعنا اللي بيحب حسام وإبراهيم وكل الشعب طبعا بيحب حسام وإبراهيم.
البرامج الرياضية تتغنى بفوز المنتخب المصري وحصد النقاط الثلاث :
إبراهيم فايق في برنامجه الكرة مع فايق:
مبروك لمصر مبروك للعميد اللي بتثبت إنه دايما شايف اللي احنا موش شايفينه وطالما بيكسب يبقى هو على حق ، عشان هو شايف الل احنا موش شايفينه أو بمعنى أدق مش عارفين نشوفو، يعمل اللي يعمله بقى يطلع صلاح ،مايلاعبش مرموش ، يطلع هيثم حسن ، ينزل زيزو ينزل على محمود إن شالله ينزلني انا شخصيا ..يا باشا اعمل مابدالك ماحدش هايقولك بتعمل ايه ، وياريت اللي يتكلم عن خروج فلان أو علان ماسمعش صوته واللا إيه يا شيكا؟!
شيكابالا ضيف إبراهيم فايق :
حسام حسن ده يا أخي بيثبت لنا كل يوم انه مدرب كبير، مدرب موش عادي ، كونك إنك تمتلك الجرأة على إخراج النجم صلاح عشان تغير الخطة ده في حد ذاته مغامرة لمدرب قدير عارف هو بيعمل إيه ، وبتغير الخطة في الوقت المناسب ، صلاح لعب ستين دقيقة ماكانش احسن حاجة ، ودايما يا إبراهيم المدير الفني الكبير بيبقى شايف الحتة دي ..امتى تكون موفق وامتى ماتبقاش ماشية معاك وده بالظبط اللي عمله حسام لما خرج نجم كبير زي صلاح .
ويلتقط الحديث منه مقاطعا إياه لاعب الزمالك السابق الجالس على يمينه :
معلش يا شيكا ماهو برضه حسام نجم كبير وتاريخ كبير في الكرة المصرية ونجم زيه زي صلاح وبيتعامل مع النجوم كنجم زيهم ودي ميزة إن اللي يدرب منتخب مصر يكون نجم كبير وله تاريخ زي حسام حسن آه صحيح … وإبراهيم كمان ..آه وإبراهيم كمان !
أحمد شوبير ببرنامجه الناظر :
فرحتنا ياعميييد ..أسعدتنا ياعميييييد …يا سلام عليك يا عميييييد ، زيزو عملها وفرحنا ..زيزو عملها ومرجحنا .. زيزو عملها وأثبت أن البديل مايقلش عن اللي خرج ..كلهم ولاد مصر وانت يابني فرحت مصر ..فرحت الجماهير في الاستاد ..فرحت المصريين في البيوت. فرحت الوطن العربي كله ..شوطة ولا في الخيال ..شوطة ولا ع البال شوطة عال العال ، وزي ماقال كابتن لطيف الكورة اجوال !
أحمد ياسر صارخا وشارحا هدف زيزو :
الدقيقة تسعين وكلنا خلاص بنستعد ندخل ننام ودمعتنا على خدنا إذ يشاء ربك إن زيزو يقول لأ والله ما يحصل ، حسام حسن صح وانا هاثبتلكوا إنه صح ، وهوب يتمتطع زيزو وبقوة ميتين حصان يرزع قنبلة على شمال حارس أنجولا الواد شيكوبانزا بتاع الزمالك شوف كان فين في آخر خط وسط منتخب مصر هناك اهوه شايف هناااااك..واتخض منها ..فرتكت الشبكة ، وصلاح بعد ما كان زعلان على خروجه قام هو كمان أهوه بيضحك بعد ماكان زعلان،
على فكرة ياجماعة صلاح ماكانش زعلان عشان مجرد إنه اتبدل ..لا انا باقولكوا لأة لأة ..انتوا ماتعرفوش صلاح ..ده كان زعلان عشان ماكانش موفق في المباراة مش عشان إنه اتبدل .
ألف مبروك ياكابتن حسام ومصر كلها معاك ووراك وزي ما كنا هنا هانبقى هناك !
** مانشيتات الصحف والمواقع :
المنتخب المصري يفوز على أنجولا وهدف زيزو يثبت رؤية حسام حسن الفنية الثاقبة
* منتخب العميد يفوز على منتخب أنجولا العنيد
* زيزو يحقق ما عجز عنه كبار المحترفين ويحرز القاضية في الدقيقة 90
* مصر تفوز على أنجولا بالقاضية بقدم نجم المباراة البديل زيزو
* اتحاد الكرة يهنئ حسام حسن ولاعبو المنتخب المصري بالفوز المثير
* أبناء العميد يستعدون لموقعة جنوب السودان بعد الفوز على أنجولا بصاروخية زيزو
وطبعا يا سيدي لم يكن محمد صلاح ليغادر المعسكر ولا كان
سيعتذر عن لعب مباراة مصر امام جنوب السودان عشان الملعب ترتان ، ولا حتى الأهلي كان سيخرج ببيان الدفاع عن الشناوي كمان لأنه كان سيظهر كما لو كان يضرب كرسيا في كلوب الفرح .
هدف واحد فقط كان سيتغير معه كل شئ وخاصة حينما يحرزه البديل زيزو ..
منك لله يازيزو !!
