أكلة المصريين
بقلم ابراهيم الطير
الفول والزيت والمية
أكلة والله هنية
أكلة كل المصريين
في لمة حلوة عالطبلية
أو في الشارع عالعربية
والصينية رايحة جاية
والريحة فاحت سمنة
تصحي الناس من الصبحية
أو سندوتش في الكلية
يسند طالب للعصرية
والفول فيها صاحب قرار
حتى الزيت منه يغار
ويحب يبان فوق الوش
فنبلعه بشوية مية
تظبط المعدة مع الطعمية
وتكمل أحلى طبلية
والفول يضحك في هدوء
ويقول أنا الأصل يا عنية
ومعاه سلطة وطحينة
وشوية شاي في الخمسينة
تخلي المزاج حاجة جميلة
يا أكلة بقت من التراث
وعنوان العيلة المصرية
