لماذا ننجذب للأشخاص الخطأ؟
كتبت / دكتورة ولاء عبدالصبور (أخصائى الصحة النفسية )
كام مرة لقيت نفسك في علاقة مع شخص مش مناسب ليك ومع ذلك حسيت بانجذاب قوي ناحيته؟ ليه بنكرر نفس الأخطاء العاطفية رغم معرفتنا إنها ممكن تؤذينا؟ الحقيقة إن الانجذاب للأشخاص الخطأ مش مجرد صدفة ده نتيجة لعوامل نفسية عميقة بتأثر على قراراتنا من غير مانغير ماندرك
أول العوامل النفسية اللي بتخلينا ننجذب للأشخاص الخطأ عامل اسمه النمط العاطفي المتكرر ، بمعنى إننا بنعيد خلق أنماط عاطفية مألوفة لنا من أيام الطفولة ، أوضح أكتر يعني إنت لو نشأت في بيئة كان الحب فيها غير مستقر أو مشروط هتلاقي نفسك منجذب بشكل لا واعي لأشخاص بيعيدوا نفس التجربة وده بيأكد مقولة نحن نبحث عن المألوف حتى لو لم يكن صحياً
تاني عامل هو إننا بنتعود على الألم العاطفي، بمعنى إن فيه أشخاص بيربطوا الحب بالصراع والمعاناة لأنهم مجربوش شكل تاني للحب، زي الأب اللي بيضرب بنته وبعدين يقولها أن بضربك علشان بحبك فتربط بين الألم والحب على رأي الست أم إبراهيم جارتنا أنا ماحسش بحب جوزي غير لما يصبحني بعلقة
تالت عامل هو الميل لإصلاح الآخرين، في ناس بترتبط بأشخاص مخصوص علشان يساعدوهم أو يغيروهم وده بيخليهم يختاروا أشخاص غير مناسبين وبالتالي العلاقة بتصبح غير متوازنة لأن ده بيخليك تتحمل مسؤولية إصلاح شخص تاني على حساب نفسك
رابع عامل هو إنخفاض تقدير الذات، معناه إنك لو شايف نفسك لا تستحق الحب والإحترام هتقبل بعلاقات مش بتقدرك ولا بتحترمك وبالتالي هتستمر في العلاقة حتى لو مؤذية ليك
خامس وآخر عامل الكمياء العاطفية والعقل الاواعي، وده معناه باختصار إننا أحياناً ممكن نحس بانجذاب قوي لشخص معين مش علشان هو مناسب لنا لكن لأن عقلنا الواعي بيربط الشخص ده بتجارب سابقة مألوفة والإنجذاب ده مش دليل على الحب لكن هو استجابة نفسية لما اعتدنا عليه
طيب إزاي نكسر الدايرة دي ؟
أول حاجة نتعرف على النمط المتكرر يعني تراقب اختياراتك العاطفيه وتسأل نفسك هل أنا بكرر نفس الأخطاء؟
تاني حاجة تزود ثقتك بنفسك لأن ده هيزود قدرتك على اختيار شريك يستحقك
تالت حاجة تفكر بعقلانية وماتسبش مشاعرك تقودك وقيم العلاقة على أساس التوافق والاحترام
آخر حاجة عالج جروحك العاطفية قبل الدخول في أي علاج جديد.
