حكاية الشاب الذي قال لمبارك حكومة إيه وفقر إيه وأراد مبارك تكريمه!
ناصر العشماوي
حكايات وذكريات الدكتور مصطفى الفقي ،سكرتير الرئيس الراحل حسني مبارك ،عن الفترة التي قضاها داخل رئاسة الجمهورية ،كثيرة ومتعددة ومن ضمن تلك الحكايات ،ما حكاه الفقي عما حدث لأحد الشباب مع الرئيس الراحل ،حينما طلب الشاب رقما وكان على الطرف الآخر الرئيس مبارك وذلك عن طريق الخطأ!
يقول الدكتور مصطفى الفقي :
في مرة الرئيس مبارك كان في العجمي وكان عنده خط مخصوص للاطمئنان على اسرته بعيدا عن خطوط الرئاسة يعني الخط ده اللي يعرفه أهله وبس.
فالمهم اتصل به واحد بالخطأ وقاله فندق سان ستيفانو ؟!
فالرئيس في الوقت ده كان فاضي شوية وعايز يتسلى فده جاله من السما فالرئيس مبارك بدأ معاه حوار وقاله :
وعايز سان ستيفانو ليه فقاله عندي وفد من شركة سيراميك في ايطاليا عايزه ينزل في الفندق .
فقاله انت خريج إيه فقاله هندسة فقاله طب مشتغلتش في الحكومة ليه ؟!
فقاله حكومة إيه وفقر إيه .. أنا كده أحسن بكتير .
فالرئيس مبارك اتبسط اوي من كلام الشاب ده لكن الشاب كان اتضايق من كلامه وكتر أسئلته وقاله :
ممكن اعرف مين اللي بيكلمني وعرف عني كل حاجة وانا معرفش عنه حاجة خالص ؟
فمبارك قاله : يعني لو قولتلك هتصدقني ؟ قاله : ايوه ومصدقكش ليه ؟
فقاله أنا رئيس الجمهورية ياسيدي؟
فالولد قاله يا سلام علي تقل الدم ياأخي والهزار السخيف وقفل السكة.
يواصل الفقي :
فمبارك ضحك جدا وقال للي كانوا معاه إن الولد ده كان في ايده خاتم سليمان ورفضه .
فقالوا له إزاي فقالهم إنه كان ناوي يطلع الشاب ده في التليفزيون ويكرمه ويحطه في مكانة كبيرة لو كان صدق أنه فعلاً بيكلم رئيس الجمهورية!
