الضغوط النفسية… لما الدنيا تخليك تحت الاختبار
كتبت / سمر جرجس
اخصائية ارشاد نفسي و اسري و زواجى و تعديل سلوك
فيه أوقات بنحس إن الدنيا ماسكة عصاية وبتخبطنا على دماغنا من كل ناحية…
مشاكل شغل ، مسئوليات بيت ، علاقات متوترة ، ظروف اقتصادية صعبة، وأحيانا كمان ماضي مزعج بيطلع لنا فجأة .
اللحظات دي هي اللي بنسميها “الضغوط النفسية”
وصدقني مفيش بني آدم معفي منها.
لكن الفرق مش في إنك تتجنبها الفرق في إزاي توقف على رجلك قدامها.
الضغط النفسي ببساطة هو حالة من التوتر أو القلق بتحصل لما نحس إن المطلوب مننا أكتر من اللي نقدر نعمله.
ساعات بيكون مؤقت زي قبل امتحان أو قبل مقابلة شغل ، وساعات بيطول ويستمر بالشهور والسنين.
طيب هل الضغوط دى ليها انواع؟؟
أنواع الضغوط النفسية
* الضغط الحاد (اللي بيعدي بسرعة)
ده بييجي فجأة في مواقف معينة، زي ما تكون داخل على امتحان مهم أو بتستعد لعرض تقديمي قدام ناس. بيسيب أثره لحظات أو أيام قليلة وبعدين يختفي.
* الضغط المزمن (اللي بيمسك فيك)
ده بقى صعب شوية، لأنه بيكون نتيجة مشكلة طويلة الأمد ، زي خلافات عائلية ما بتنتهيش أو وضع مادي صعب. النوع ده لو ما اتعالجش ممكن يبوظ صحتك النفسية والجسدية.
* الضغط الإيجابي:
هو فى ضغط ايجابى؟؟
آيوة فيه ضغط ايجابى كويس !
ده اللي بيشجعك ويديك دفعة، زي لما يكون عندك هدف جديد أو تحدي في الشغل. بيخليك تركز وتشتغل على نفسك.
* الضغط السلبي
وده اللي بيستنزفك ويسحب طاقتك، وبيخليك حاسس إنك تايه وعايز تهرب من كل حاجة.
طيب عرفنا انواع الضغوط .. يا ترى بقا الضغط بيأثر علينا إزاي؟
١ – نفسياً
ممكن يخليك قلق طول الوقت، مش عارف تنام، فاقد الحماس، ومش قادر تركز حتى في الحاجات الصغيرة.
٢ – جسدياً
صداع، ضربات قلب سريعة، مشاكل في المعدة، وضعف في المناعة.
٣ – اجتماعياً وسلوكياً
تبعد عن الناس، تزيد عصبيتك، تلجأ للأكل أو التدخين أو حتى الكحول كوسيلة للهروب.
طيب و الحل ايه و نعمل إيه؟
١ – اعرف أصل المشكلة
ساعات بنبقى مضغوطين ومش عارفين السبب جرب تكتب كل اللي شاغل بالك يمكن تكتشف إن فيه حاجة واحدة بس هي اللي بتسحب كل طاقتك.
٢ – نظم وقتك
لما تحط أولوياتك وتخلص الأهم الأول، بتحس إنك ماسك زمام الأمور بدل ما الدنيا تجرّك.
٣ – مارس رياضة
حتى لو مشوار مشي نص ساعة، الحركة بتفرز هرمونات السعادة وبتخفف القلق.
٤ – جرب الاسترخاء
التنفس العميق، التأمل، أو حتى قعدة هادية على القهوة المفضلة ليك، بتفرق كتير.
٥ – اتكلم
المشاعر لما بتتحبس جوانا بتتضخم. شارك حد تثق فيه، أو لو حسيت إن الموضوع أكبر من قدرتك، ماتترددش تروح لمعالج نفسي.
٦ – حافظ على جسمك
الأكل الصحي والنوم الكافي بيعملوا فرق كبير في قدرتك على مواجهة الضغوط.
٧ – ابعد عن الحلول المؤقتة
التدخين أو الإدمان مش هيحلوا حاجة بالعكس هيزودوا المشاكل.
طيب ليه مهم نتعامل مع الضغوط قبل ما تكبر؟
لأن الضغط النفسي لو ما اتلحقش، بيبدأ صغير وبعدها يتوحش ويأثر على كل جوانب حياتك
زى شغلك، علاقاتك، صحتك. والكارثة إنك ممكن تتعود عليه، وتحس إن العيشة بالقلق والتعب أمر طبيعي… وده أكبر خطر.
أخيراً
▪️الضغط النفسي زي البحر
ساعات بيكون هادي وساعات بيعمل موج عالي يهد اجدع سفينة مش مهم قوة الموج المهم إنك تكون ماسك الدفة صح
▪️خد بالك من نفسك قبل أي حاجة لأنك أنت الأساس.
ومهما كانت الظروف افتكر دايماً إن الضغط مش دايم لكن صحتك النفسية لو ضاعت صعب ترجع زي الأول.
خليكوا عارفين ان الراحة مش رفاهية الراحة ضرورة.
وأقوى خطوة ممكن ناخدها هي إننا نقف نلقط أنفاسنا ونقرر إننا نستعيد حياتنا من تاني ♥️
سمر جرجس
اخصائية ارشاد نفسى و اسري و زواجى و تعديل سلوك
