(ضامن إيه)
خايفة.. والخوف مش منك ولا م الزمان
خايفة عشان بتغير أكتر من اللي كنت عارفة زمان
خايفة وأنا كلي خوف.. خوف من نفسي كمان
وخايفة من قلبي.. اللي محسش معاك الأمان
أيوه أنا اللي حلمت بيك.. واتمنيت أكون ليك
وعشت عمري كله.. بوهب قلبي وحياتي ليك
أيوه أنا اللي عذبتها.. وأكتر من مرة جرحتها
ولا مرة حسستها.. إنها غالية عليك
جرحي كان عندك عادي.. غدرك بيا شيء متعود عليه
بسهولة تستغنى عني.. ويهون عليك قلبي وعينيه
ضامن أنت وجودي؟.. طب فكر تاني كده ضامن أنت إيه؟!
لو ضامن عمري.. عمري راح مع كل مرة وجعتني
لو ضامن قلبي.. قلبي مات جواه حبك لأنك دمرتني
لو ضامن روحي.. روحي شابت ده ياما عذبتني
لو ضامن عيني.. ما بقتش تشوفك غير إنك قاسي وجرحتني
أيوه أنا اللي بفكر.. آخد قرار
حتى ولو كان صعب.. وبسببه حياتي بتنهار
بس موتة هي ولا أكتر.. معاك قلبي مات وعاش في النار
وبإيدك أنت هديت.. آخر حاجة تجمعني بيك
وبسببك.. أخدت القرار
الشاعرة نجوى الحاروني
