الطبطبة الرقمية ..
قلوب وهمية ولا حب بجد؟!
كتبت / سمر جرجس
اخصائية ارشاد نفسى و اسري و تعديل سلوك
عضو إتحاد المعالجين النفسيين العرب
فى الزمن ده بقينا نعيش على قلوب وهمية .. قلب أحمر ♥️ صغير على شاشة التليفون يخلينا نحس إننا محبوبين
او كلمة في كومنت تخلينا نحس إننا مش لوحدنا
الطبطبة اللي كانت زمان بحضن وكلمة وصوت دافي .. اتحولت دلوقتي لـ”إشعار” على الموبايل. السؤال بقا هو إحنا فعلاً بنتطبطب على بعض ولا بنضحك على نفسنا؟
هقولك!!
زمان الطبطبة كانت بكلمة .. بحضن .. بابتسامة من اللي قدامك
النهاردة بقينا نستنى الطبطبة من شاشة صغيرة في إيدنا
قلب أحمر ❤️
لايك 👍
أو كومنت “إنتي قمر”
للاسف بقينا نقيم نفسنا بعدد المتابعين ونقيس أهميتنا بعدد التفاعلات.
بس يا ترى .. الطبطبة دي حقيقية ولا مجرد أوهام افتراضية؟
تعالوا نشوف
اولا : إدمان الإشعارات
عارف الإحساس لما الموبايل ينور بإشعار جديد؟ قلبك يدق أسرع وتقول: “مين عمل لايك؟ مين رد عليا؟؟
الموضوع بقى أشبه بالإدمان .. دماغنا بيفرز دوبامين – هرمون السعادة – مع كل إشعار
بس زي أي إدمان .. الجرعة دي مبتكفيش .. لازم نزود .. ننزل بوست تاني .. نصور صورة جديدة .. او نكتب حاجة تلفت الأنظار
ثانياً : الطبطبة اللحظية
الطبطبة الرقمية زي كباية عصير ساقع في عز الحر
تديك راحة سريعة بس بعدها عطشك بيرجع أقوى.
اللايك بيفرّح.. الكومنت يطبطب.. بس بعد شوية الإحساس بيروح. تلاقي نفسك تاني يوم عايز نفس الاهتمام.. أو أكتر.
ثالثا : المقارنة القاتلة
المشكلة إن الطبطبة دي مش بس لحظية .. دي كمان بتفتح باب المقارنة
تشوف حد منزل صورة في مكان شيك أو لابس لبس غالي أو كاتب كلام رومانسي عن شريكه
هنا تبتدي تسأل نفسك…
ليه أنا معنديش ده؟ هو أنا أقل؟
وهنا بدل ما الطبطبة تديك أمان للاسف بتسرق منك سلامك
رابعا : فجوة حقيقية
رغم آلاف القلوب اللي ممكن تجيلك على صورة .. تكتشف إنك في الآخر لسه حاسس بالوحدة.
لأن الطبطبة الرقمية عمرها ما تعوض كلمة صادقة من أمك أو حضن من صاحبك وقت ما تحتاج أو اهتمام بجد من شريك حياتك.
و فى أمثلة كتير من حياتنا زى مثلا
* البنت اللي تنزل صورة جديدة وتفضل تعيد تحميل وتشوف مين عمل لايك، ولو العدد قليل تبتدي تحس إنها وحيدة.
* الشاب اللي يكتب بوست غامض “أنا تعبان” علشان يستنى مين هيكلّمه ويطبطب عليه.
* الزوجة اللي تقارن صور بيتها على السوشيال ميديا ببيوت غيرها وتحس إنها أقل.
كل الأمثلة دي بتقول إننا بقينا ندور على الطبطبة في المكان الغلط.
طيب إزاي نرجع للطبطبة الحقيقية؟
تعال اقولك ..
١ – وزع الكلمة الحلوة في حياتك اليومية
كلمة “بحبك” أو “موجود معاك” تفرق ألف مرة عن أي لايك.
٢ – اقعد مع حد بتحبه من غير موبايل
اللحظة دي هي الطبطبة الحقيقية.
٣ – حب نفسك الأول
لأن أكتر طبطبة محتاجها هي اللي تطلع منك لنفسك مش من أي شاشة
٤ – قلل اعتمادك على التفاعل الافتراضي
افتكر إن صورك أو بوستاتك مش مقياس لقيمتك
أخيراً
الطبطبة الرقمية شبه السكر الصناعي 🪄
شكله حلو وطعمه سريع بس عمره ما يشبعك ولا يغذيك
الطبطبة اللي بجد لسه في الكلمة الطيبة
في الحضن اللي من غير شروط
في وجود حد جنبك من غير ما يطلب “سيلفي”
ويمكن أهم طبطبة في حياتك.. إنك تطبطب على نفسك وتفتكر إن قيمتك مش في عدد القلوب اللي على الشاشة لكن في قلبك اللي بيعرف يحب بجد.
