هل المرض النفسي وراثي؟
في كل اسره دائما في حد بيقول
“فلان طلع زيه زي أبوه .. دماغه تعبانة!!
أو الجنون بيجري في دم العائله دي!!
لكن هل ده حقيقي؟؟
هل المرض النفسي بيتنقل بالجينات زى لون العين والشعر؟
ولا مجرد صدفة وظروف؟
في المقال ده، هنعرف الحقيقة.
أولًا .. يعني إيه مرض نفسي؟
المرض النفسي مش “جنون” ولا ضعف شخصية هو خلل في طريقة عمل الدماغ بيأثر على التفكير، المزاج، والسلوك .
ثانياً .. ما الأمراض النفسية التي لها علاقة بالوراثة؟
تشير الدراسات إلى أن الوراثة تلعب دورًا في بعض الاضطرابات أكثر من غيرها، منها:
١ – الاكتئاب (Depression)
نسبة وراثته حوالي ٣٠–٤٠ %.
٢ – الاضطراب ثنائي القطب (Bipolar Disorder)
نسبة وراثته تصل إلى ٦٠– ٨٥ %
٣ – الفصام (Schizophrenia)
نسبة وراثته حوالي ١٠ – ٦٠ %
٤ – اضطراب نقص الانتباه وفرط الحركة (ADHD)
نسبة وراثته من ٧٠ –٨٠ %
٥ – القلق العام والوسواس القهري
لهما جانب وراثي متوسط، خاصة مع وجود تاريخ عائلي
و لا يوجد “جين واحد” مسؤول عن المرض، بل بيكون بسبب خليط معقد من:
عوامل وراثية + بيئية + كيمياء المخ + أحداث الحياة.
هل المرض النفسي وراثي فعلًا؟
نعم .. لكن مش لوحده.
الدراسات بتقول إن الوراثة لها دور مهم لكنها مش السبب الوحيد.
بمعنى ..
لو في حد من العيلة بيعاني من اضطراب نفسي إنت بتكون أكثر عُرضة لكن مش حتميا تصاب بيه.
مثلًا
لو أحد الوالدين عنده اكتئاب شديد احتمالية إصابة الأبناء تزيد عن المتوسط، لكنها ليست مؤكدة.
لكن لو مفيش أي حد في العيلة عنده نفس المرض؟
تظل احتمالية الإصابة موجودة بسبب:
✅ ضغوط الحياة
✅ تجارب الطفولة
✅ العلاقات السامة
✅ التعرض لصدمات أو فقد
إزاي بتحصل الوراثة النفسية؟
العلم أثبت إن مفيش جين واحد مسؤول عن المرض النفسي إنما هو نتيجة تداخل أكتر من جين مع عوامل بيئية.
يعني:
الوراثة بتجهّز “الأرض”والحياة بتقرر إيه هيتزرع فيها.
👈 مثلًا:
ممكن يكون عندك استعداد وراثي للقلق، لكن لو حياتك مستقرة ونفسيتك متوازنة، المرض مابيظهرش.
⚠️ ليه مهم تعرف المعلومة دي؟
لأن فيه ناس بتورّث ولادها الخوف من المرض أكتر من المرض نفسه.
بتفضل تقوله:
خلي بالك .. إحنا عندنا تاريخ في العيلة!
فبتزرع جواه فكرة إنه ضعيف أو مهدد دايمًا.
و ده أخطر من الوراثة الجينية!
💡 نصيحة من أخصائية نفسية
✔️ لو عندك تاريخ عائلي، خليك واعي
✔️ راقب نفسك من بدري
✔️ خد بالك من مزاجك وردود فعلك
✔️ اهتم بصحتك النفسية زي ما بتهتم بجسمك
✔️ والأهم… متحكمش على نفسك،
ولا تخاف من جيناتك.
المرض النفسي قابل للعلاج ومش دايمًا بيورّث واللي عنده استعداد مش معناه إنه لازم يعيشه.
📌 الخلاصة
الوراثة عامل مهم في الأمراض النفسية لكنها مش قدر محتوم
العوامل البيئية والظروف والمواقف الشخصية بتلعب دور أكبر
الوعي و الدعم والعلاج بيكسروا أي استعداد جيني
وأخيرًا …
أنت مش سجين جيناتك.
ولا رهينة ماضي عيلتك.
إنت تقدر تبدأ صفحة جديدة … في دماغك وقلبك و حياتك
بقلم الاخصائية النفسية
سمر جرجس
اخصائية ارشاد نفسى و اسري و زواجى
