أسطورة مصر حسام حسن يزلزل الضمير الإنساني والعالم بالمؤتمر الصحفي : سيبوا الشعب الفلسطيني يعيش !
كتب : ناصر العشماوي
أطلق أسطورة مصر الكروية، عميد لاعبي العالم ،حسام حسن المدير الفني للمنتخب المصري، تصريحات زلزلت الضمير الإنساني، وهزت مشاعر العالم العربي والعالمي والإنسانية كلها، خلال المؤتمر الصحفي الذي انعقد كما تجري العادة قبيل المباريات ، وتستعد مصر لمواجهة الأرجنتين اليوم الثلاثاء في السابعة مساء .
وفي المؤتمر الصحفي الذي عقد مساء أمس سألت صحفية تركية العميد عن لقطة رفع علم فلسطين وهل من المكن ان يكررها مرة ثانية حال فوز مصر على الأرجنتين؟
فكان رد العميد حسام حسن زلزالا حقيقيا هز قاعة المؤتمر واستوجب في نهايته أن يتلقى تصفيقا حادا من الإعلاميين والصحفيين الرياضيين المتواجدين بالقاعة
قال حسام حسن :
إنه لو فيه إنسان على وجه الأرض مش حاسس بمعاناة الشعب الفلسطيني، يبقى ده مش إنسان أساسًا، وفقد إنسانيته خلاص…
وقال العميد : إنه قبل ما يكون مصري أو عربي، فهو إنسان، والإنسان الطبيعي لازم يتألم لما يشوف آلاف الأطفال والنساء بيموتوا كل يوم، وميتعاملش مع المشهد وكأنه خبر عادي جاي في نشرة الأخبار
وواصل العميد حديثه بمنتهى الصراحة والجرأة عن المعاناة التي يعيشها أهل غزة، وقال :
إنهم عايشين بقالهم شهور من غير بيوت، ومن غير غطاء، ومن غير أكل، ومن غير مياه، وإن أقل حق لأي إنسان في الدنيا هو إنه يعيش حياة آمنة وكريمة ..ده شعوب أوروبا وأمريكا لو كلب أو حيوان في الشارع حصله أي أذى بيقلبوا الدنيا ويطالبوا بمحاكمات وحقوق حيوان، إنما لما الصواريخ تنزل تفرم أطفال ونساء في غزة كل يوم، كله بيعمل نفسه مش شايف!
وقال نصًا : “إحنا قاعدين في تكييفات وقصور والأكل قدامنا، وأهالينا هناك قاعدين في العراء في خيم لا مياه ولا غذاء ولا علاج، وناس زعلانة إننا بنرفع علمهم وبندعمهم في دقيقتين؟!
انا بتمنى إن أصحاب القرار يتدخلون إنسانيا وباقول لو يتخيلوا أولادهم يوم واحد بس في نفس الظروف… في خيمة، قاعدين من غير بيت، ومن غير أمان، ومن غير أكل ولا مياه، تحت رحمة عدو ممكن في أي لحظة يرمي عليهم صاروخ عشان يحصد حياة مئات ويمكن آلاف منهم في أقل من لحظة ولو استطاعوا يتخيلوا ده لثانية واحدة، يمكن وقتها يحسوا بفداحة اللي بيعيشه الشعب الفلسطيني كل يوم!
هما عايشين في العراء تحت الشمس والحر في الصيف وفي عز التلج والبرد في الشتا ، يعني الناس في العالم كله في الحر بيقروا يحتموا بالبيوت ويشغلوا التكييفات للهروب من الحر ، وفي الشتا برضه ندور على الأغطية والتدفئة واحنا جوة البيوت والقصور والفلل على مختلف حياة كل فئة ، لكن اهل غزة في الشارع ..في العراء ، تخيل نفسك أو حد من ولادك مكانهم وشوف يعني هاتعمل ايه .
وواصل : الحكاية ملهاش دعوة انت ديانتك إيه مسلم مسيحي يهودي مالهاش دعوة بالديانة خالص ، دي لها دعوة بإنك إنسان واللا لأ .
وفي نهاية رسالته، طلب من العالم في عبارة بسيطة وسهلة لكنها هزت وجدان العالم واستحوذت على آلاف التعليقات والمشاركات عبر السوشيال ميديا حينما قال :
الشعب الفلسطيني بني آدمين زينا وزي كل الناس في العالم من لحم ودم ووش والدين ورجلين ماهما حاجة تانية يعني بني آدمين زيهم زي البني آدمين اللي في العالم كله فأنا بقول للعالم كله ولأصحاب القرار :
“سيبوا الشعب الفلسطيني يعيش” !!
شاب فلسطيني يهدي حسام حسن لوحته الفنية وسط الركام
