اسرار الحوار بين الفريق أول عبدالفتاح السيسى ومحمد مرسى فى 2يوليو

كتب : د.عبدالله مباشر  رومانيا

يوم 2 يوليو سنة 2013؛ الفريق أول عبدالفتاح السيسي اجتمع مع محمد مرسي في قصر الرئاسة..

الفريق السيسي قال لمرسي: الوضع سيء.. وسيادتك مش عايز تحل المشكلة..

مرسي رد: الدنيا تمام.. والشعب معانا وبيحترم الرئيس الشرعي.. وعشان كده الناس منزلتش في 30 يونيو..

السيسي قاله: منزلوش إزاي؟.. في ملايين في الشوارع بقالهم يومين..

مرسي استغرب وقال: دي كلها صور فوتوشوب.. اللي شاركوا في المظاهرات 120 ألف بس..

السيسي قاله: لا يا فندم.. معلوماتك غلط.. الأعداد وصلت لـ33 مليون..

مرسي كشر ورد عليه: لا لا.. الكلام ده غلط.. وعلى العموم أنا بطلب منك تقف مع الشرعية..

السيسي قاله بحزم: الشرعية للشعب.. والشعب كله في الشارع.. والقوات المسلحة مش هتسيب المصريين لوحدهم أبدًا.. وأنا بطلب منك تستجيب لمطالب الناس..

مرسي انفعل وسأله: ناس مين؟.. دول شوية حاقدين ومتآمرين على مصر.. الشعب مع الرئيس ومع الإخوان.. وإحنا هنحكم 500 سنة على الأقل..

السيسي ابتسم ورد عليه: الناس دي هي شعب مصر.. ومفيش قدامكم إلا الاستجابة لمطالبهم.. وأولها انتخابات رئاسية مبكرة..

مرسي اعترض وقال: مش ممكن.. أنا رافض الانتخابات..

السيسي رد: الجيش مش طمعان في حاجة.. بس إحنا مش هنفضل ساكتين ونسيب مصر تنهار… البلد داخلة على حرب أهلية ولازم حل.. بس أنت مش مساعدنا..

مرسي سخر من الكلام وقال: ولا حرب أهلية ولا حاجة.. وأنا بحذرك أنت والقوات المسلحة.. شباب الإخوان مش هيسمحوا بتدخل الجيش وهيتصدوا ليه..

السيسي انفعل ورد عليه: اللي هيقف قدام الجيش هنسحقه بكل ما نملك.. وأنا اللي بحذركم من رد فعلنا..

مرسي ابتدى يهدي في الكلام لما لقى الفريق السيسي انفعل، وقاله: إنت غضبان ليه؟.. إحنا بنقدرك وبنحترمك.. لكن أنا القائد الأعلى.. وإنت متقدرش تتجاوز الشرعية..

السيسي قاله: الشعب هو مصدر الشرعية.. وبقولك تاني البلد داخلة على حرب أهلية بسبب عنادكم..

مرسي سكت ثواني، وبعدين قال: الحرب الأهلية هتحصل لو انقلبتوا على الشرعية.. وعموما الأمريكان مش هيسكتوا على أي انقلاب..

السيسي رد: الجيش مش هيفضل يتفرج.. ولا الأمريكان ولا غيرهم ليهم حق يدخلوا.. وإحنا لا بنخاف ولا بنتهدد..

مرسي عرف إن مفيش فايدة، فقاله: أنا رئيس شرعي منتخب وهكمل مدتي.. ومن الآخر مش هستجيب للموضوع ده.. وشوفوا لو عندكم مطالب تانية نبقى ندرسها بعد انتخابات البرلمان إن شاء الله..

السيسي لمّ ورقه وقام من مكانه وهو بيقول لمرسي: على العموم أنا بحذرك من خطورة اللي جاي..

وبعد كده طلع على وزارة الدفاع.. واجتمع مع القيادة العامة للقوات المسلحة.. وبلغهم باللي حصل بينه وبين مرسي..

بعض القادة طلبوا منه التحرك الفوري لإنقاذ البلد من الفوضى..

لكن الفريق السيسي قالهم: خلينا نستنى 24 ساعة كمان ونحاول نحل الموضوع بهدوء..

ويوم 3 يوليو، بعت أحمد فهمي، رئيس مجلس الشورى، عشان يحاول يقنع مرسي يعمل انتخابات رئاسية مبكرة..

لكن مرسي رفض بعناد أي حل وسط.. ولا حتى الاستفتاء على الانتخابات الرئاسية المبكرة..

ولما أحمد فهمي بلغ الفريق السيسي برد مرسي.. عرف إن خلاص لازم يتحرك..

صلى صلاة استخارة.. وبعدها خرج بيان 3 يوليو اللي حرر مصر من الإخوان.