متاع الأوجاع.. بقلم علاء الداودي - النايل نيوز
الرئيسية » متاع الأوجاع.. بقلم علاء الداودي
اخبارمقالات

متاع الأوجاع.. بقلم علاء الداودي

كتب المقال بواسطة أ/
*/
وقت القراءة: 1 دقيقةفيسبوكإكس

بتفتح الموبايل، بتشوف فلان سافر، فلان اشترى، فلان حياته “فلّ”، وفلان ولاده مثاليين.. بتقفل الموبايل وبتبدأ “تجلد” في نفسك: “هو أنا ليه حياتي مش كده؟ هو أنا ليه مقصر؟”.
الحقيقة يا صديقي إنك بتقارن “كواليسك” بـ “الشو” بتاع الناس.. أنت شايف صورة مُعدلة ، ومنسي إن ورا الصورة دي ديون، ومشاكل، ودموع، ومواقف محدش يعرف عنها حاجة.
ربنا سبحانه وتعالى قطع الشك باليقين في سورة طه:
{وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا}

كلمة “زهرة”.. هي دي المفتاح!
ربنا مسماش متاع الدنيا “بيت” أو “أساس”، سماها “زهرة”. والزهرة مهما كانت جميلة، هي بتدبل بسرعة، وجودها مؤقت، ومجرد “منظر” عشان يختبرنا.
المشكلة إننا بنشوف الزهرة دي وبننسى “الجنينة” اللي ربنا أدهالنا.. بننسى نعم ربنا الخاصة بينا، عشان مشغولين بنعم غيرنا.

“ماتمدش عينك”.. دي مش نصيحة، دي وقاية!
مد العين ده (التركيز المستمر على حياة غيرك) هو اللي بيجيب “المرض” للقلب:
بيجيب عدم الرضا.
بيجيب الحقد.
بيخليك “كومبارس” في حياة الناس، بدل ما تكون “بطل” في حياتك أنت.

إزاي نخرج من “فخ المقارنة” ونبدأ نعيش؟
قاعدة “التركيز على حديقتك”: بدل ما تبص في جنينة غيرك، شوف إيه اللي في أرضك ومحتاج يتسقى.. صحتك، بيتك، ولادك، موهبتك. الزرع في أرضك أضمن وأبقى.
الامتنان هو “الترياق”: جرب تكتب كل يوم ٣ حاجات بسيطة ربنا أنعم عليك بيهم ومحدش غيرك شايفهم. ده اللي بيطرد “سم” المقارنة من قلبك. افهم “اللعبة”: السوشيال ميديا مش واقع، دي “معرض”. ومحدش في معرض بيعرض “عفش بيته القديم”، كله بيعرض اللي يلمع. صدقني، اللي بتشوفه “مثالي” عنده مواجع بتوجعه زي ما عندك مواجع بتوجعك.
الخلاصة..
خليك “فراك” في شغلك، في عبادتك، وفي تطوير نفسك، بس خليك “قنوع” بـ “الرزق” اللي ربنا قسمهولك. الرضا مش إنك تقف مكانك، الرضا إنك تتحرك وأنت “راضي” مش “حاقد”.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *